Иднината на четирикратниот светски шампион во Формула 1, Макс Ферстапен, повторно е под прашање, откако италијанскиот Sky објави дека преговорите со Мерцедес се интензивирани пред трката за Големата награда на Велика Британија.
Според нивните информации, Ферстапен е „блиску до договор“ со германскиот тим, иако нема официјални потврди ниту од Мерцедес, ниту од Ред Бул. Спекулациите започнаа уште за време на тркачкиот викенд во Австрија, кога Тото Волф, шефот на Мерцедес, потврди контакт со таборот на Ферстапен.
Ферстапен има долгорочен договор со Ред Бул до 2028 година, но според шпекулации, во договорот постојат клаузули кои му овозможуваат излез, доколку не се постигнат одредени резултати. Една од нив може да биде пласман под одредено место до летната пауза (по трката во Унгарија на 4 август).
Во моментов е трет во генералниот пласман, но по инцидентот во Австрија, има само 9 поени предност пред Џорџ Расел – токму возачот на Мерцедес.
Шефот на Ред Бул, Кристијан Хорнер, ги отфрли шпекулациите како „бучава без основа“, но советникот Хелмут Марко призна дека клаузули постојат, иако нагласи дека засега нема причина да не се испочитува договорот.
Мерцедес веќе објави дека во 2025 година ќе го ангажира младиот Кими Антонели, но засега ниту тој, ниту Расел немаат официјално потврден договор за наредната сезона.
Дополнително, големите промени во техничкиот правилник што стапуваат на сила следната година би можеле да ја насочат одлуката на Ферстапен. Ред Бул за првпат сам ќе ги произведува своите мотори, додека Мерцедес се смета за технолошки лидер.
