Анализа на 800.000 автомобили во Европа открива шокантни факти: хибридните возила реално загадуваат околината скоро пет пати повеќе отколку што покажуваат лабораториските тестирања. Според најновата студија, податоците откриваат дека хибридите емитуваат само 19% помалку јаглерод диоксид во споредба со бензинските и дизел автомобилите, додека лабораториските тестови покажуваат дека овие возила загадуваат 75% помалку од стандардните. Ова истражување е спроведено од страна на непрофитната организација Transport and Environment, пренесува Гардијан.
Европските производители на автомобили активно промовираат хибридни возила (PHEV), кои комбинираат електрични батерии со мотори со внатрешно согорување, како решение за намалување на емисиите на штетни гасови. Меѓутоа, реалните податоци, како што изјави научничката Софија Навас Голке, покажуваат дека овие возила всушност емитуваат сè повеќе штетни гасови, иако лабораториските тестови укажуваат на спротивното.
Истражувачите анализирале податоци за 800.000 возила во периодот од 2021. до 2023. година. Разликата помеѓу нивните резултати и лабораториските тестирања се објаснува со фактот дека хибридните автомобили во просек користат електричен погон само 27% од времето, додека официјалните процени тврдат дека тој процент е 84%. Анализата исто така укажува на тоа дека иако Европската комисија најави две корективни мерки за намалување на оваа разлика, таа нема да биде целосно надмината.
Студијата открива дека дури и кога работат во електричен режим, хибридните возила емитуваат повисоки нивоа на штетни емисии од официјалните процени. Причината за тоа е што нивните електрични мотори не се доволно моќни за самостојно функционирање, па за време на третина од дистанцата што ја поминуваат на електричен погон, користат и фосилни горива. Аналитичарот Колин Вокер истакнува дека смелите тврдења на производителите на автомобили за нивните хибридни возила не се реални.
Хибридните возила повторно се на мета на политичките дебати, додека производителите на автомобили вршат притисок на ЕУ да ублажи поставените цели за намалување на емисијата на CO2. Забраната на автомобили со мотори со внатрешно согорување до 2035 година се соочува со противење од страна на авто-индустријата и земјите со развиена автомобилска продукција. Германскиот канцелар Фридрих Мерц изјави дека не смее да дојде до драстично намалување на производството на автомобили со мотори со внатрешно согорување до 2035 година, додека некои германски политичари гледаат на хибридните возила како начин за постигнување на поголема флексибилност во новите прописи на ЕУ.
