27 јули 2024 година, Мелбурн, Австралија – Светскиот Македонски Конгрес – Австралија денес го одржа традиционалниот Петти годишен Илинденски гала бал по повод 121 годишнината од Илинденското востание 1903 година за слобода на Македонскиот народ и државноста на Македонија.
На Илинденскиот Бал настапија две водечки македонски културно-уметнички друштва во Австралија – Австралиско-Македонското фолклорно друштво “Гоце Делчев“ и Македонското културно-уметничко друштво “Александар III Македонски“, со изведба на повеќе македонски ора и песни.
Специјални гости на Балот беа Сања Ристеска која на почетокот ја испеа македонската национална химна, а присутните со македонски персни и ора ги забавуваше Експрес бенд од Мелбурн. Водител на Балот беше Георге Трпковски.
Поздравно обраќање пред присутните имаше претседателот на Светскиот Македонски Конгрес – Австралија, Роберт Стојановски.
– Светскиот Македонски Конгрес во Австралија ќе продолжи со одбележувањата на значајни датуми, настани и личности, ќе го афирмира македонскиот етнички, јазичен, културен, верски и државен идентитет, континуитет, наследство и простор, ќе се бориме за правата и слободите на Македонците во целиот свет, – изјави претседателот на Светскиот Македонски Конгрес во Австралија, Роберт Стојановски.
Членовите на Светскиот Македонски Конгрес во Австралија покажаа и докажаа дека се добри домаќини и организатори на традиционалниот годишен Илинденски бал. Неколку стотини Македонци уживаа во спомените за Илинденското востание и во богатата културно-уметничка програма.
