18 декември 2024 година, Тирана, Албанија – По барањето на Македонско друштво “Илинден” од Тирана почна рекострукција и реставрација на црквите во Ербеле и Горно Крчишта во областа Голо Брдо.
Албанскиот национален институт за културно наследство на Албанија, објави дека почнала реконструкција, реставрација и расчистување на просторот кај неколку верски објекти, меѓу кои и црквите „Свето Преображение“ во село Ербеле и „Свети Спас“ во село Горно Крчишта, населени со Македонци.
– Во округот Пешкопеа (Долни Дебар) во тек е реализација на реставраторски проекти на објекти од особено значење за зачувување и промоција на нашето културно наследство. Го заштитуваме културното наследство, ја зголемуваме туристичката привлечност и придонесуваме за одржлив развој на регионот, – стои во објавата на Институтот.
Црквата „Свето Преображение“, која датира од 12 век е во селото Ербеле, област Поле или Долни Дебар, во близина на македонската граница кај Дебар. Од 1970 година е прогласена за споменик на културата.
Некогаш во селото имало многу македонски семејства, но се иселиле, па денес, се само две кои постојано живеат тука и се грижат за црквата. По традиција, Македонците по потекло од Ербеле кои денес живеат во Тирана, Драч, Елбасан, Маќелара, Тетово, Скопје и други градови, како и оние малкуте од неколку села во областа, одржуваат Македонска средба по повод големиот христијански празник, Преображение – патрон на селската црква.
Црквата „Свети Спас“ во селото Горно Крчишта е изградена во 1232 година и е споменик на културата, која за време на режимот на Енвер Хоџа била претворена во магацин. На 13 јуни 2009 година беше преосветена, а одредени неопходни градежни активности се реализирани со помош на Македонци, поранешни жители на Крчишта, од фамилијата Радевски и Дуковски.
Поранешните жители и нивните потомци одржуваат традиционална Македонска средба по повод празник Вознесение Христово-Спасовден, патрон на црквата, на која богослужба години на ред одржува Ристо Камбуроски свештеник во Кичево, но по потекло од Крчишта.
Барање за реставрација и заштита на црквите до Институтот, во 2019 година достави Македонското друштво “Илинден” од Тирана.
