Стевчо Јакимовски, на својата последна прес-конференција пред официјално заминување од функцијата истакна дека општината од „длабоко загубена“ ја оставил во стабилна финансиска состојба со значителен раст на приходите.
„Кога стапив на функција на 4 ноември 2021 година, од мојот претходник наследив блокирана сметка од 330 милиони денари и дополнителна блокада од УЈП од 39 милиони денари, односно вкупно 369 милиони денари. Да потсетам, тогашниот буџет на општината во 2020 година изнесуваше 363 милиони денари, што значи дека долгот бил повисок од целокупните приходи“, изјави Јакимовски.
Тој нагласи дека по четири години работа, општината денес има 72 милиони денари на жиро-сметка, со измирени сите тековни обврски и редовно сервисирани судски пресуди.
Според Јакимовски, Општина Карпош денес бележи историски раст на приходите.
„До денес приходите изнесуваат 700 милиони денари, а до крајот на годината се очекува да достигнат речиси 800 милиони. Тоа значи дека презедов општина со околу 6 милиони евра приход и 6,5 милиони евра долг, а ја оставам со 13 милиони евра приход“, истакна тој.
Во однос на градежната активност, Јакимовски нагласи дека за време на неговиот мандат Карпош избегнал „бетонска експлозија“.
„Во моментот во Карпош се градат само една висококатница, два објекта во Момин Поток и три помали згради од по пет ката. За разлика од тоа, во други општини во Скопје во изградба се над 80 згради повисоки од шест ката“, посочи тој.
Поранешниот градоначалник изјави дека успешното менаџирање на приходите и покачувањето на даночните стапки ја направиле општината „самоодржлив проект“, додавајќи дека стабилизацијата на финансиската состојба е доказ за одговорно управување со јавните средства.
