Селекторот на машкиот сениорски национален тим, Јошко Миленкоски е добитник на наградата „8 Септември“ за животно дело во областа на спортот, која денеска на пригодна свеченост во Собранието на Република Македонија му ја додели Министерството за спорт.
Најтрофејниот и најуспешен македонски одбојкарски стратег наградата за животно дело ја добива за исклучителен придонес во развојот на спортот, афирмација и промоција на Република Македонија на меѓународен план. Проф. д-р. Миленкоски е истакнат македонски одбојкар, универзитетски професор, долгогодишен одбојкарски тренер и актуелен селектор на македонската одбојкарска репрезентација.
Миленкоски како тренер предводеше врвни клубови и репрезентации во Македонија, Турција, Грција, Тунис и Црна Гора, освојувајќи шампионски титули, национални и суперкуп трофеи, како и учества во елитни европски натпреварувања.
Како универзитетски професор на Факултетот за физичко образование, спорт и здравје при Универзитетот „Св. Кирил и Методиј“ во Скопје, автор на пет книги и повеќе од сто научни трудови, активен учесник на меѓународни конгреси и член на Македонскиот олимписки комитет и на Македонскиот антидопинг комитет, проф. д-р Јошко Миленкоски остави трајна трага во развојот на спортот и образованието. Во 2016 година беше одликуван како спортски амбасадор, активно придонесувајќи за меѓународната промоција и афирмација на Македонија и македонскиот спорт.
Државна еднократна награда „8 Септември“ за остварувања во спортот добија четворица истакнати спортски работници: Хамид Бакија (боречки спортови), Зоран Николовски (фудбалски судија), прим. д-р Виктор Тевчев (спортска медицина) и Кирил Манев (новинар).
Извор:vfmkd.org.mk
