Македонската фудбалска репрезентација ќе одигра пријателски натпревар против Саудиска Арабија на 4 септември, на стадионот „Викторија“ во Прага, Чешка – информира Фудбалската федерација на Македонија (ФФМ).
Овој контролен дуел ќе биде важна можност за селекторот Благоја Милевски да ја тестира формата на своите избраници и да ги провери тактичките замисли пред продолжението на квалификациите за Светското првенство во 2026 година.
Само три дена подоцна, на 7 септември, Македонија ќе го пречека Лихтенштајн на Националната арена „Тодор Проески“ во Скопје, во рамки на групата Ј од квалификациите.
По одиграните четири квалификациски натпревари во јуни, Македонија се наоѓа на првото место во групата со осум бодови (две победи и две ремија), пред Велс (7 бодови од 4 натпревари), Белгија (4 бодови од 2 натпревари), Казахстан (3 бодови од 3 натпревари) и Лихтенштајн (0 бодови од 3 натпревари).
Според форматот за СП 2026, директен пласман ќе обезбедат победниците на 12-те квалификациски групи, додека второпласираните ќе добијат шанса преку плејоф, заедно со четирите најуспешни репрезентации од групната фаза на Лигата на нации (А, Б, Ц и Д). Преку плејофот ќе се изборуваат уште четири места за завршниот турнир во САД, Мексико и Канада.
