Кандидатот за градоначалник на Скопје од партијата Левица, Амар Мециновиќ, на својата прва прес-конференција по влезот во вториот круг од локалните избори, изрази силно незадоволство од, како што рече, „недемократскиот преседан“ создаден од институциите под политичка контрола, особено АВМУ. Според него, ова е без преседан во историјата на изборите во Македонија. “Само еден кандидат има пристап до билборди, медиумски простор и рекламирање, додека другиот, кој доби поддршка од скопјани, е целосно исклучен од тој простор,” нагласи Мециновиќ, додавајќи дека ова е аларм за демократијата и ќе биде забележано во меѓународните извештаи.
Мециновиќ истакна дека е неопходно да се демократизира општеството, критикувајќи ја, како што вели, „апсолутната власт“ на ВМРО-ДПМНЕ, ВРЕДИ и ЗНАМ. Тој повика на прекин на, како што рече, тоталната репресија врз јавниот интерес. “Скопјани сега имаат избор меѓу системот кој 30 години го истрошува градот и нова визија која не е поврзана со бизнис-интересите,” изјави тој.
Мециновиќ истакна дека е подготвен за соработка со централната власт и со сите советнички групи во Советот на Град Скопје, без оглед на исходот од изборите. “Ние немаме намера да го блокираме градот, дури и ако не победиме. Ќе бидеме конструктивна опозиција,” рече тој, додавајќи дека градоначалникот треба да биде израз на политичка волја, а не приватен интерес.
На крајот, тој најави продолжување на теренските активности и нагласи дека кампањата не се однесува на него, туку на визијата за Скопје. “Имаме јасен избор, статус кво или промена која сите заедно ќе ја изградиме,” додаде Мециновиќ. Во однос на можната поддршка од други политички партии, тој изрази надеж дека ќе добие поддршка од сите здраворазумни скопјани, особено од оние кои беа на работ дали да гласаат или не во првиот круг.
Мециновиќ упати и директен апел до гласачите на СДСМ. “Иако партијата е во политичка криза, таму има многу луѓе кои ја делат визијата што јас ја претставувам. Ги повикувам сите кои ја поддржаа госпоѓата Каја Шукова во првиот круг, да ме поддржат мене во вториот,” повика тој. На прашањето за дебата со Орце Ѓорѓиевски, нагласи дека го повикува противкандидатот пред Школка во парк, вон студиски простории, на дебата на која ќе имаат право сите национални и територијални медиуми со различни уреднички редакции.
