Млад возач од битолско е лишен од слобода откако бил фатен како се движи со повеќе од двојно поголема брзина од дозволената.
Според информациите од полицијата, на 1 февруари околу 15:25 часот, на регионалниот пат Битола–Маково, полициски службеници од СВР Битола при радарска контрола го запреле П.Г. (22) од село Ношпал. Тој управувал патничко возило „ауди“ со битолски регистарски ознаки со брзина од 139 километри на час, на делница каде ограничувањето изнесува 60 километри на час.
Возачот веднаш бил лишен од слобода, а по целосно документирање на случајот против него ќе биде поднесена кривична пријава за „безобѕирно управување со моторно возило“, согласно член 297-а од Кривичниот законик.
Од полицијата потсетуваат дека ваквото дивеење на патиштата сериозно ја загрозува безбедноста на сите учесници во сообраќајот и најавуваат засилени контроли во наредниот период.
