Од синоќа, водата во Берово е забранета за пиење и готвење, а може да се користи само за технички цели. Градот и околните населби, кои се снабдуваат со вода од јавниот водовод, остануваат без безбедна вода за консумација. Причината за оваа мерка е зголемената концентрација на манган, а одлуката е донесена од Агенцијата за храна и ветеринарство (АХВ).
„Одлуката е донесена од Агенцијата за храна и ветеринарство (АХВ), преку Секторот за инспекциски надзор – ПЕ Берово, по спроведена анализа на водата. Инспекцискиот надзор покажал дека водата содржи зголемена концентрација на манган, што е над дозволените граници предвидени со Правилникот за вода за пиење,“ велат од АХВ.
Јавното претпријатие за комунални работи „Услуга“ потврди дека забраната ќе важи сè додека водата не биде преработена и прочистена, така што ќе ги исполни сите пропишани стандарди за безбедност и здравје на граѓаните. Претпријатието е задолжено веднаш да преземе мерки за прочистување и стабилизирање на водоснабдувањето, со цел повторно воспоставување на нормална и безбедна дистрибуција.
Општина Берово апелира до граѓаните да ја користат водата од чешмите само за технички цели, како што се чистење и перење, додека не пристигнат официјалните резултати од акредитираната лабораторија кои ќе потврдат дека водата повторно е безбедна за консумација. Оваа мерка ќе остане на сила сè додека не се добијат лабораториски резултати што ќе ја потврдат исправноста на водата, а јавноста ќе биде редовно информирана за секоја промена во состојбата.
