Во духот на одбележувањето на 8 Октомври – Денот на ослободувањето на Крива Паланка, во афтентичен амбиент на „Етно гостилница Воденица 3“ се одржа традиционалната манифестација „Шопска Софра 2025“, која годинава повторно го разбуди мирисот и вкусот на кривопаланечкиот крај.
Настанот се одвиваше во пријатна празнична атмосфера, со презентација и дегустација на традиционални специјалитети, солени и слатки, внимателно приготвени од вредните раце на локалните домаќинки. Софрата наликуваше на гастрономско богатсво со рецепти што се пренесуваат од генерација на генерација – сведоштво за богатото кулинарско наследство на кривопаланечкиот регион.
„Шопска Софра 2025“ не е само гастрономски настан – таа е симбол на семејството, заедништвото и топлината на домот. Во време кога глобалните трендови полека го менуваат секојдневието, токму ваквите манифестации претставуваат силен потсетник за значењето и очувувањето на автентичната култура, вкус и обичаи.
Преку оргаризирањето на вакви манифестации, општина Крива Паланка настојува да се очува традицијата и да се сподели со светот, и секако да се даде можност за развој – преку поддршка на локалната храна, туризмот, малите производители и угостителскиот сектор.
Манифестацијата „Шопска Софра 2025“ е место каде што минатото, сегашноста и иднината седнуваат за иста трпеза –трпеза исполнета со љубов, со почит и со вкус што останува во сеќавањето на секој посетител.
Извор:www.krivapalanka.gov.mk
