Градоначалникот на Куманово, Максим Димитриевски, денеска ги повика истражните органи да го испитаат случајот со продажбата на парцела на која треба да се гради маркет на „Лидл“. Тој ги отфрли наводите на СДСМ за можен корупциски скандал, инсистирајќи дека трансакцијата е направена транспарентно и во согласност со законот.
Според Димитриевски, земјиштето од 1.200 м² е сопственост на неговото семејство и е добиено како наследство со турска тапија. Тој објасни дека истото било продадено на неговиот кум, кој подоцна склучил преддоговор со „Лидл МК“ на 23 февруари 2024 година, а купопродажниот договор бил потпишан претходно, на 26 јануари. Само три дена подоцна, „Лидл“ покренал иницијатива за усогласување на деталниот урбанистички план (ДУП) со Законот за урбанистичко планирање од 2020 година.
„СДСМ веќе не е партија, туку остатоци од мафија која се тресе за своите фотелји. Колку повеќе лажат, толку посилен ќе биде нашиот одговор“, изјави Димитриевски. Тој негира дека нов ДУП веќе е донесен, велејќи дека на последната седница бил усвоен само нацрт-документ и дека ни со новиот план не се менува намената и габаритот на парцелата.
СДСМ, пак, излезе со објавени документи, меѓу кои и полномошно со кое кумот на Димитриевски му овластува на „Лидл“ да иницира промени во ДУП. Оттаму прашуваат дали постои таен договор меѓу кумот и „Лидл“, според кој тој се обврзува да издејствува измена на планот во рок од две години.
„Дали е точно дека, иако наплатил 600.000 евра, кумот може да користи само 180.000 евра, а остатокот од 420.000 евра останува замрзнат сè до евентуална измена на планот?“, прашуваат од партијата.
СДСМ го оценува случајот како потенцијално најголем корупциски скандал во Куманово и повикува Државната комисија за спречување на корупцијата и Јавното обвинителство итно да постапат.
