Републичкиот совет за безбедност во сообраќајот (РСБСП) со соработка со МВР, Факултет за безбедност-Скопје, како и останатите партнери на ден 16.11.2025 во Градскиот парк во Скопје го одбележа „Светскиот ден на сеќавање жртвите од сообраќајни незгоди“.
На одбележувањето на настанот, од страна на претседателот Горан Ангеловски и директорот на Бирото за јавна безбедност Александар Јанев, заеднички беа испратени силна пораки за почитување на животот и за потребата од градење на повисока сообраќајна култура.
Претседателот Ангеловски истакна дека РСБСП изминатиот период активно работи со нов пристап на кампањите преку едукација, превенција и подигнување на јавната свест.
„Овој ден не е само момент на тага – тој е повик. Повик до сите нас, граѓани, возачи и институции, да се соочиме со реалноста која секојдневно носи нови загуби. Секој живот изгубен на патот остава длабоки траги, не само врз семејствата, туку и врз општеството. Не е доволно само да жалиме, мораме да делуваме“, порача Ангеловски.
На овој ден не треба да се заборави дека безбедноста во сообраќајот не е само индивидуална одговорност, туку заедничка мисија. Во таа насока директорот на БЈБ, Александар Јанев, ја истакна важноста на партнерството меѓу институциите и граѓаните.
„Тие животи не се бројки. Тоа се имиња, лица и индивидуални приказни што предвреме завршиле. Не смееме да дозволиме македонските патишта да станат поголемо бојно поле по згаснати животи отколку реалните воени конфликти. Токму затоа сите ние како граѓани, родители, возачи, како дел од општеството и како институции имаме заедничка обврска да ја подигнеме свеста, да влијаеме со личен пример и со секојдневни разговори да градиме подобра сообраќајна култура“, истакна директорот Јанев, додавајќи дека полицијата е само една алка од целиот систем.
Во рамки на настанот симболично беа пуштени балони со бројот 142 кој го означуваат и бројот на загинати лица во 2024 година, како и симболичен марш низ Градскиот парк во чест на жртвите во сообраќајни незгоди. Притоа, беа поделени превентивно-едукативни летоци со порака да се присетиме на вредноста на човековиот живот и почитувањето на сообраќајните правила и прописи. Во реализацијата на овој настан активно учество зедоа и учениците од сообраќајната секција на АСУЦ „Боро Петрушевски“ – Скопје.
Во текот на наредните денови низ градовите ширум Републиката, РСБСП во соработка со Општинските совети (ОСБСП) и МВР продолжуваат со реализација на активности за одбележување на „Светски ден на сеќавање на жртвите од сообраќајни незгоди“.
РСБСП апелира: Нека денешниот ден биде потсетник, но и нов почеток – кон одговорно однесување, кон живот, не кон смртта – „секој живот е важен“!
Извор:rsbsp.org.mk
