На 6 септември, за првпат ќе се одржи хуманитарната трка „Голак Треил“, спортски настан кој обединува планинско трчање и брзо одење низ живописните предели на планината Голак. Трката ќе биде посветена на прерано починатиот Иле Гоцевски, возач во Брзата помош во Кочани, кој за време на трагична несреќа 11 пати патувал до Скопје за да спасува животи. Во негова чест, должината на патеката ќе изнесува токму 11 километри – симболичен потсетник на неговата пожртвуваност и човечност.
Настанот е отворен за сите љубители на спортот и природата кои сакаат да го доживеат предизвикот и убавината на планината. Средствата собрани од котизациите ќе бидат донирани на организацијата Support Кочани, со што трката добива силен хуманитарен карактер.
Главната цел на „Голак Треил“ е промоција на планината Голак и нејзините природни убавини, како и популаризација на планинскиот спорт и активниот туризам во источниот регион. Голак е позната како планина со уникатна комбинација од три клими – континентална, планинска и медитеранска, што ја прави вистинска воздушна бања и идеално место за рекреација и спорт.
