Вардар по осум години славеше во Тетово против Шкендија во дербито на колото во Првата македонска фудбалска лига. Најтрофејниот македонски клуб славеше со минимални, но големи 0:1 на гостувањето во Тетово. Ова е прв триумф на „црвено-црните“ по дури 21 одигран натпревар.
Со овие три бода, Вардар се искачи на лидерската позиција на табелата по десет одиграни кола со 24 бода, пред Струга која има еден помалку, додека Шкендија падна на четвртото место со 21 бод.
Средбата во Тетово започна со внимателно и тактичко надмудрување на двата тренери. Во првиот дел немаше многу возбудувања, домашните се обидуваа со удари од далечина, но голманот Давор Талески беше одличен и не дозволи изненадување. Вардар прв се закани преку Мато, чија топка беше расчистена, а потоа Матиќ биеше над голот. Најблиску до погодок беше Азер Омерагиќ, кој по нафрлување од Мато со глава шутираше крај стативата.
Највозбудлив момент во првото полувреме беше во 31. минута, кога Шкендија создаде три големи шанси во само неколку секунди. Бесарт Ибраими опасно биеше од слободен удар, но Талески со феноменална парада спаси. По одбиената топка следуваше удар на Спахиу кој го расчисти Филип Најдовски од гол-линија, а потоа и повторниот обид на Ибраими го одбрани Талески. На одмор се замина без голови.
Веднаш на стартот од второто полувреме, по корнер на Вардар, Алхасан направи невнимателен потег и играше со рака во скок. Судијата Стојанче Трпчевски покажа на белата точка, а Давид Бабунски сигурно реализираше за водство од 0:1 во 49. минута.
По водството, Вардар играше мирно и зрело. Мато продолжи да прави проблеми на одбраната на Шкендија, додека домаќините се обидуваа преку Тамба и Ибраими, но Давор Талески беше непогрешлив меѓу стативите. Во завршницата, младите Данев и Тодоровски донесоа свежина во редовите на Вардар, кој преку контри можеше и да ја зголеми предноста, но недостасуваше последниот пас.
Во 87. минута Ибраими постигна погодок за радост на домашната публика, но по преглед на ВАР снимката, голот беше поништен поради офсајд.
Трите бода заминаа за Скопје, а Вардар со оваа победа уште еднаш потврди дека се враќа во голем стил. Во следното коло Вардар ќе го пречека Силекс во ново дерби на врвот, додека Шкендија ќе гостува кај Брера во Струмица.
Извор/Фото:www.ffm.mk
