Споменикот на слободата во Кочани е најимпозантниот споменик во Источна Македонија. Лоциран на ридот Локубија, овој споменик претставува голем комплекс од отворени ѕидни конструкции на кои се поставени мозаици изработени од страна на Глигор Чемерски.
Изградбата на овој комплекс започнала во 1975 година, а завршила две години подоцна. Распотранет е на 335 м2 на која е овоковечена историската борба на македонскиот народ за слобода од Илинденскиот период па се до НОВ.
По осамостојувањето на Македонија, споменикот бил препуштен на забот на времето и значително оштетен. Оштетувања биле направени и од несовесни граѓани кои откорнале дел од мозаикот или нанесувале графити на споменичната површина. Дел од оштетувањата биле поправени во 2004 година.
Во декември минатата година заврши реконструкцијата на споменикот вредна 250 илјади американски долари која вклучуваше конзервација, реставрација и санација на архитектурата и партерното уредување.
Сепак, останува да се среди околината и пристапот до споменикот кој е доста отежнат.
