Германски државјанин е лишен од слобода откако граничната полиција при контрола на возило открила сомнителни наркотични супстанци при обид за влез во земјава.
Инцидентот се случил околу 19:10 часот на влезот во државата, кога полициски службеници извршиле детална контрола на патничко возило „фолксваген транспортер“ со германски регистарски ознаки, управувано од М.Ј.Б.(35) од Германија.
При прегледот во возилото биле пронајдени кристална материја, како и кеса со натпис „ЛСД“, по што лицето веднаш било приведено поради сомнение за поседување и евентуален транспорт на наркотични средства.
Поради постоење основи на сомнение за сторено кривично дело по член 215 од Кривичниот законик – „неовластено производство и пуштање во промет на наркотични дроги, психотропни супстанци и прекурсори“, осомничениот е предаден на полициски службеници од СВР Куманово за понатамошна постапка.
Од Министерството за внатрешни работи информираат дека по целосно документирање на случајот ќе биде поднесена соодветна кривична пријава, а пронајдените супстанци ќе бидат испратени на вештачење.
Случајот е дел од засилените контроли на граничните премини со цел спречување на нелегален транспорт на дрога и други недозволени материи.
