Во Варшава, Полска, беше одржана проекција и изложба на проектот „Мајко мила“ на Петро Алексовски, посветен на трагедијата на македонските деца кои биле насилно прогонети од своите домови во Егејска Македонија за време на Граѓанската војна во Грција (1946–1949).
Настанот се одржа на 5 март 2026 година во Историскиот центар во Варшава, благодарение на поддршката на директорката д-р Аѓњешка Ками Пржишка.
Авторот на проектот, Петро Алексовски, чии родители се меѓу насилно прогонетите деца од Егејска Македонија, преку фотографии и документарни материјали ја претстави судбината на македонските деца кои биле евакуирани од своите домови и згрижени во различни европски земји.
Алексовски изрази благодарност до полските власти кои во 1948 година прифатиле и спасиле дел од овие деца, овозможувајќи им нов живот во Полска.
На настанот присуствуваше и амбасадорот на Македонија во Полска, Јасмин Ќахил, чијa присутност, според организаторите, го потврди интересот за историското наследство и судбината на македонската заедница во Полска.
Меѓу присутните беше и Емилија Котевска Аврамчева, потомок на насилно прогонети деца од Егејскиот дел на Македонија.
Фотографиите и сведоштвата прикажани на изложбата ја доловија суровоста на војната и последиците што таа ги оставила врз животите на децата, кои по прогонството својот живот го продолжиле во новата татковина – Полска.
Од Светскиот Македонски Конгрес упатија честитки до Петро Алексовски за неговата посветеност и истрајност во зачувувањето на сеќавањето на голготата на македонските деца прогонети од Егејска Македонија за време на Граѓанската војна во Грција.
