Стапката на сиромаштија во Република Македонија во 2024 година изнесува 21,9 проценти, покажуваат најновите, претходни податоци на Државниот завод за статистика.
Податоците се добиени врз основа на Анкетата за приходите и условите за живеење, која се спроведува согласно методологијата и препораките на Европската Унија. Како праг на сиромаштија се смета 60 проценти од медијалниот еквивалентен приход, при што основа за пресметките се приходите на домаќинствата.
Анализата по типови домаќинства покажува дека најранливи не се сите подеднакво. Кај домаќинствата составени од двајца возрасни и две издржувани деца, стапката на сиромаштија во 2024 година изнесува 17,1 процент.
Според економскиот статус, 7,9 проценти од вработените лица живеат под прагот на сиромаштија, додека кај пензионерите оваа стапка изнесува 12 проценти, што укажува дека значителен дел од повозрасната популација се соочува со финансиска несигурност.
Во извештајот е наведен и коефициентот на Џини, кој ја мери нееднаквоста во распределбата на приходите. За 2024 година тој изнесува 29,1 проценти, што укажува на умерено, но сè уште значајно ниво на економска нееднаквост во земјата.
