Интервју со Изет Зејнеловиќ, кандидат за градоначалник на Општина Тетово од редовите на политичката партија Демократи.
1. На претстојните избори ќе бидете независен кандидат за градоначалник на Општина Тетово – што Ве мотивираше да се кандитирате?
ИЗ: Мојата мотивација доаѓа директно од секојдневните проблеми на граѓаните на Тетово. Последните 30 години, нашиот град беше запоставен од партиите кои се грижеа повеќе за партиски интереси отколку за потребите на луѓето. Гледам улици полни со отпад, нефункционални институции, млади кои заминуваат и економија што стагнира – и знам дека можеме подобро. На престојните избори кандидиран сум од Политичката Партија Демократи и со задоволство ја прифатив кандидатурата за да покажам дека општината може да ја води човек кој ќе биде слуга на граѓаните, а не на партиските централи. Моја цел е да изградиме Тетово со чисти улици, функционални институции и економија што носи нови работни места.
2. Што е она што сметате дека треба најитно да се направи за Тетово?
ИЗ: Редовно чистење на улиците и воспоставување модерен систем за управување со отпадот. Реконструкција на водоводната и канализационата мрежа за да се обезбеди чиста вода за сите. Воведување на јасни правила за сообраќај, велосипедски патеки и безбедност на пешаците. Овие се основни услови без кои ниту економијата, ниту туризмот, ниту културата не можат да напредуваат.
3. За жал и Тетово како и сите општини во Македонија се соочува со иселувањето. Младите пак, заминуваат со билет за еден правец. Што е она што е неопходно и што може да се направи со цел задржување на младите?
ИЗ: Отворање на нови работни места преку партнерства со домашни и странски инвеститори. Поддршка за мали бизниси со субвенции и обуки. Подобро образование и програми за практична работа за да бидат конкурентни на пазарот. Културни и спортски центри, паркови и јавни простори каде младите ќе се чувствуваат дека овој град е и нивни дом. Младите нема да заминуваат ако веруваат дека овде можат да имаат достоинствен живот.
4. Тетово изобилува со одлични природни и културни богаства. Оттука и потенцијалот за привлекување на туристи. Но дали може Тетово да понуда квалитетна туристичка понуда?
ИЗ: Апсолутно, Тетово има огромен потенцијал за туризам – Шар Планина, Бабуна, Лешочкиот манастир, Шарената џамија и уникатната култура на различни заедници. Но, за да го искористиме овој потенцијал, потребни се: Инфраструктура – чисти улици, уредени патишта, јавни тоалети, паркинг и сигурност. Професионална туристичка промоција и организирани туристички тури. Поддршка на локалните угостители и занаетчии за да понудат автентично тетовско искуство. Со правилно планирање, Тетово може да стане регионален центар за планински, културен и гастрономски туризам.
