Без калкулации и компромис со публиката, дуото “Дупер” го гради својот звук како искрен заеднички проект што природно еволуира со секоја нова песна. За името, студиските расправии, публиката што пее погласно од нив и концертот во Античкиот театар во Охрид, дуото составено од Борис Какуринов и Илчо Нечовски, зборува искрено и без филтер.
1. Зошто името „Дупер“?
Б: За сите други имиња веќе имавме некоја асоцијација во глава. Дупер не звучеше на ништо, па рековме да му дадеме некое значење.
И: Да, повеќе идеи ни се допаѓаа ама ни една не кликна како Дупер, иако доста се измачивме да го избереме и тоа на крај. Ептен е тешко да си смислиш име сам на себе.
Не пропуштајте
- „Дупер“ првенствено звучи како проект кој не би сакал да се допадне секому по секоја цена. Намерно ли е тоа?
Б: Напротив. Ние сакаме тоа што ни се допаѓа на нас, да им го пренесеме и на другите и тоа на што е можно повеќе луѓе.
И: Дупер како заеднички проект расте и еволуира некако природно заедно со нас со секоја нова песна, спот и било што друго што можеме заедно да создадеме. Компромисот останува само помеѓу нас двајца, а ние секогаш се трудиме она што го чувствуваме и сакаме да го извадиме да му го доближиме на секој слушател најдобро што можеме.
Не пропуштајте
- Која е најголемата заблуда што луѓето ја имаат за вас?
Б: Ми се случило да ми кажат не очекував да сте толку нормални. Што и да значи тоа.
И: Искрено не ми текнува на ништо конкретно, ми значи секој пофален збор и критика што тој што чул нешто има да ми ги каже и мило ми е кога луѓето ги анализираат песните подлабоко и подетално. Сигурно имало нешто поинтересно, но го имам заборавено.
- Ако некој прв пат ве слуша, со која песна НЕ би сакале да ве запознае и зошто?
Б: Немам јас таква песна. Со која и да не запознае, тоа сме ние, какви што сме.
И: Се сложувам. Во секоја од песните има нешто што е дел и од нас и од Дупер како наше дете, па мислам дека е ферски да се слушнат сите и потоа да се прави проценка.
Не пропуштајте
- За што најчесто се расправате во студио?
Б/И: За која мелодија како треба да се испее и дали има потреба од хармонија или е доволно и без.
- Имате ли песна што знаете дека публиката повеќе ја сака отколку вие?
Б: Не знам дали има такви, ама дефинитивно има такви што се пеат погласно од други.
И: Дефинитивно Рајот на земјата.
- Ви се случило ли да заборавите текст на сцена и како се снаоѓате?
Б: Еднаш, ама среќа јас не пеам.
И: Во последно време некако почнаа сами да ми доаѓаат зборовите, ама порано ми се случуваше. Само што лесно можев да се извадам, затоа што секогаш ги памтам мелодиите, а зборови се забораваат.
- Две ваши песни што обавезно мора да бидат изведени на секој настап?
Б: Не сум твој тип е веќе очекувана, ама некои од оние што сум приметил дека посебно ги сакаат се „Пробај да ми бидеш“, „Пак и пак“ и „Некажано“.
И: „Не сум твој тип“, „Тело за на ТВ“, „Пробај да ми бидеш“, „Ние сме 2“, кои било две од овие.
- Кој од вас најчесто добива пораки „пушти ја оваа песна прва“ пред концерт?
Б: Не сум мерел тоа.
И: Не сме добиле такви пораки.
- Како реагирате кога некој од фановите прават ковер на вашите песни?
Б/И: Ептен ни е мерак. Така и гледаме дали е добра песната. Ако некој си ја пушта и пее по стопати, значи сме ја постигнале целта.
- Што ве држи мотивирани да продолжите напред?
Б: Никогаш не сум барал мотивација, затоа што музика правев дури и пред да издаваме и да има какви било реакции од публиката. На некој начин со музиката си ја задоволувам личната потреба за создавање и изразување, а сум среќен што начинот на кој го правиме допира до публиката и таа може лесно да се препознае во текстовите.
И: Мислам дека веќе и нема некоја преголема потреба од нешто да ме мотивира. Постепено се навикнувам на ова и сакам да ми биде дел од секојдневието и понатаму во животот. Кога нешто друго би ми предизвикувало такво чувство не би го оставил никогаш.
- Настап кој со нетрпение го чекате?
Б/И: Концертот на Антички театар во Охрид, 5 август 2026.
- Што да очекуваме следно од „Дупер“?
Б: Неколку нови песни, концерти и настапи. За брзо се надеваме и албум.
И: Да, во подготовки сме на нашиот втор албум кој би требало, се надеваме, да излезе што поскоро годинава. Не сме навикнати да чуваме готови песни неизвадени, па ќе биде голем предизвик и за двајцата. Можни се и неколку соработки исто така.
- Со која ваша песна би сакале да ги поздравите вашите фанови?
Б: Некажано.
И: МОЖЕ, МОЖЕ, МОЖЕ!
Н. Заовска
