Македонската машка сениорска одбојкарска репрезентација утре во 20 часот во СЦ „Борис Трајковски“ во Скопје ќе го одигра последниот натпревар од квалификациите за Европското првенство 2026 против Грузија. Влезот на натпреварот е слободен, а победата со максимален резултат и што подобра поен-разлика е клучна за Македонија да се пласира на своето четврто континентално првенство по ред, по ЕП 2019, 2021 и 2023 година. За разлика од Македонија, Грузија никогаш не учествувала на ЕП.
По поразот без освоен сет на гостувањето во Грција, македонските одбојкари ќе мораат да победат со 3:0 и да загубат што помалку поени во сетовите, при што ќе мораат да чекаат и на поволен исход од натпреварите во другите групи. Селекторот Јошко Миленкоски изјави дека натпреварот со Грција е оставен зад себе и дека сега целосно се фокусираат на мечот со Грузија, со надеж дека со поддршката од домашната публика ќе го остварат посакуваниот резултат и ќе обезбедат уште едно учество на Европското првенство.
Македонија ја започна кампањата за пласман на ЕП 2026 на најдобар можен начин, со убедлива победа над Грузија на гости во Тбилиси со 3:0 (25-12, 25-14, 25-18). Тогаш најдобро одиграа Александар Љафтов со 14 поени, капитенот Никола Ѓоргиев со 12, и Филип Савовски со 11 поени, а Грузија освои само 44 поени.
Во последната и најважна средба, се очекува полна сала и силна поддршка од љубителите на одбојката, што ќе биде клучно за македонските одбојкари да ја остварат целта и да се пласираат на уште едно Европско првенство.
