Булеварот Борис Трајковски, кој е клучна сообраќајница за жителите на Кисела Вода и Драчево, стана симбол на неуспехот на четиригодишното владеење на ДПМНЕ и Данела Арсовска. Оваа изјава ја даде Каја Шукова, кандидатка за градоначалник на Скопје од СДСМ, која денеска ја посети оваа важна сообраќајница. Шукова истакна дека состојбата со булеварот е резултат на целосна незаинтересираност и хаос од страна на актуелната власт.
„Четири години ДПМНЕ и нивната избраничка Данела не мрднаа со прст за да ги довршат преостанатите 2,5 км од булеварот Борис Трајковски. Барем Орце Ѓоргиевски, додека пиеја кафиња со Данела Арсовска, да ја посетеше за еден од најгорливите проблеми во неговата општина“, рече Шукова. Според неа, булеварот останува недовршен и небезбеден за над 50.000 граѓани од овој дел на градот, што е неприфатливо.
Шукова нагласи дека ваквото неодговорно однесување наскоро ќе заврши, најавувајќи целосно завршување на проектот. „Не поради политички маркетинг, не поради пи-ар, туку поради тоа што ова е базична потреба на граѓаните од овој дел на Скопје, нешто што нужно им следи и што е обврска на секој кој ја добил довербата да управува со градот“, додаде таа.
Таа исто така сподели дека нејзината визија за Скопје е метропола со современа сообраќајна инфраструктура, логично поврзана со современ јавен превоз и сообраќајни решенија кои гарантираат ефикасност и безбедност за граѓаните. Шукова заврши со порака дека булеварот Борис Трајковски треба да биде она што Скопје го заслужува – безбеден и ефикасен за надминување на сообраќајниот метеж.
