Со приближувањето на зимските месеци, од 15 ноември стапува на сила обврската за поседување зимска опрема за сите возачи. Температурите се намалуваат, а полицијата ги потсетува возачите дека без соодветна опрема, безбедноста на патиштата е загрозена. Многу возачи веќе ги замениле гумите, додека некои чекаат последен момент, но сите се согласни дека зимската опрема е клучна за безбедно возење.
Министерството за внатрешни работи (МВР) потсети на важноста од поседување зимска опрема во периодот од 15 ноември до 15 март. Според Законот за безбедност на сообраќајот, возилата кои не се опремени со зимски гуми или синџири за снег ќе бидат подложни на казни и забрани за движење. „За моторни возила кои не надминува 3.500 кг: – зимски пневматици на сите четири тркала, со минимална длабочина на шарите на нагазниот слој по обем и широчина од четири милиметри; За моторни возила кои надминува 3.500 кг: – зимски пневматици на погонските тркала со минимална длабочина на шарите на нагазниот слој по обем и широчина од 6 мм.“, велат од МВР.
Зимските услови можат да дојдат ненадејно, па возачите се советуваат да се подготват навреме за да избегнат непријатности на патот. МВР продолжува да апелира до возачите да се придржуваат кон законските обврски за зимска опрема, бидејќи тоа е клучно за непречено и безбедно одвивање на сообраќајот во зимски услови. Безбедноста на патиштата зависи од нашата подготвеност.
