Престижната награда „Нерешки мајстори“, што ја доделува Друштвото на ликовните уметници на Македонија, оваа година му припадна на професорот Родољуб Анастасов. Наградата беше врачена на Годишната изложба која свечено се отвори во Мултимедијалниот центар „Мала станица“ во Скопје.
Уметничкиот совет на ДЛУМ ги додели и признанијата за најуспешни дела годинатава – наградата за сликарство ја доби Елена Гелева, додека наградата за графика ѝ беше доделена на Зоран Бошковски.
Во рамки на настанот, ДЛУМ додели благодарници на соработниците и институциите кои значајно придонеле во реализацијата на програмата. Меѓу нив се директорот на Универзалната сала Скопје, Горјан Христовски, директорот на Музеј и галерија Кавадарци, Јаким Зимоски, за изложбите „Мал формат“ и „МиниАРТура“, како и вишиот кустос во Националната галерија на Македонија, Маја Чанкуловска-Михајловска, за долгогодишната соработка со друштвото.
Изложбата во „Мала станица“ ќе биде отворена за посетители до 22 декември.
