Во деновите помеѓу 2 и 5 септември, Свештената Бигорска Обител ја имаше честа да биде домаќин на четвртата по ред Малореканска научна конференција, насловена „По патеките на Дичо Зограф“. Оваа угледна научна средба беше организирана со благословот на нашиот почитуван надлежен Митрополит, Неговото Високопреосвештенство г. Тимотеј Дебарско-кичевски, под покровителство и благослов на нашиот Старец и Игумен на Бигорскиот Манастир, Преосветениот Епископ Антаниски г. Партениј, а во соработка и коорганизација со проф. д-р Сашо Цветковски.
Свечениот чин на отворање на конференцијата се одржа на 2 септември, во сечесниот храм на Светите Првоврховни Апостоли Петар и Павле, во с. Тресонче, родното место на иконата на македонското фрескосликарство и иконопис Дичо Зограф. Благословот за успешна и плодотворна работа го испрати Старецот Епископ г. Партениј, преку Високопреподобниот Архимандрит г. Доситеј, кој во таа прилика отслужи трисагија во спомен на зографот Димитар – Дичо Крстев и на другите творци на нашата духовна уметност и култура. Професорот г. Сашо Цветковски, истакнат научен соработник од МАНУ, одржа пригоден говор со кој ги поздрави организаторите и учесниците во научниот собор. На овој настан присуствуваа научни работници, студенти и членови на здружението „Брзовец“ од с. Тресонче, како и градоначалникот на општина Маврово и Ростуше, г. Медат Куртовски.
Во текот на следните денови, во салата за настани во Бигорскиот Манастир, беа одржани четири сесии, на кои реномирани истражувачи во областа на историјата на уметност и на архитектурата имаа свои презентации. Со свои трудови учествуваа следниве научни работници: Сашо Цветковски, Александар Василевски, Дарко Николовски, Ненад Макуљевиќ, Светлана Смолчиќ – Макулевиќ, Васил Ѓеоргиев – Ликин и Борис Марковски.
Четвртата Малореканска конференција заврши во понеделникот вечерта, со свечено доделување на сертификати за учество. Во името на владиката г. Партениј нив ги додели манастирскиот економ г. Доситеј, кој им заблагодари на сите учесници и го акцентираше значењето на ваквите научни собири за културното и историско наследство на регионот. Како општо резиме на годинешнава конференција беше нагласокот на потребата за обрнување на поголемо научно внимание на уникатниот иконостас во бигорскиот католикон, кој претставува светско ремек-дело со неизмерно уметничко и духовно значење, и како таков треба да влезе како културно наследство во УНЕСКО.
