Социјалната мрежа X, во сопственост на Илон Маск, повторно се соочува со технички проблеми, што предизвика незадоволство кај корисниците ширум светот. Според податоците од веб-страницата Downdetector, бројот на пријави за проблеми со платформата драстично се зголемил, а корисниците известуваат дека не можат да пристапат до своите профили, објави и фидот не се учитуваат, и тоа и на мобилната апликација и на веб-верзијата.
Во моментов, нема официјално објаснување за причините за падот на услугата. Овој прекин доаѓа во време кога X веќе е под притисок поради контроверзниот Grok AI алат, кој предизвика сериозни дебати откако се појавија случаи на генерирање експлицитни слики на познати личности, како и содржини кои вклучуваат малолетници. Не е познато дали падот на мрежата е поврзан со проблемите со Grok AI.
Компанијата досега не се огласила во врска со актуелниот прекин на работата. Оваа ситуација дополнително ја комплицира позицијата на X, која веќе се соочува со критики и регулаторни испитувања во различни земји. Корисниците со нетрпение очекуваат информации за решавање на проблемите и враќање на нормалното функционирање на платформата.
