На Клиничкиот центар во Сараево утринава почина легендарниот пејач на народна музика Халид Бешлиќ. Еден од најомилените уметници на просторите на поранешна Југославија ја загуби битката со тешка болест, по подолг период на лекување на Одделот за онкологија.
Бешлиќ веќе подолго време беше хоспитализиран, а според изјавите на неговиот менаџер, лекарите неодамна планирале да го пуштат дома бидејќи покажувал знаци на подобрување. За жал, неговата здравствена состојба нагло се влошила.
Живот и кариера на еден од најголемите балкански уметници
Халид Бешлиќ е роден на 20 ноември 1953 година во општина Соколац, каде што и пораснал на планината Романија. Во јавноста често раскажуваше дека детството му било среќно, мирно и безгрижно. Својата сопруга Сејда ја запознал во времето кога го снимал првиот сингл, а нивниот брак го одбележа голема љубов и посветеност.
Двајцата го добија синот Дино, а Халид секогаш истакнуваше дека семејството му е најголемата сила и поддршка. Во 2014 година стана дедо – Дино и неговата сопруга Махира добија близначиња, Ламија и Белмин-Кан. Тогаш Халид изјави дека тоа бил најсреќниот момент во неговиот живот.
Од кафани до музичка легенда
Музичкиот талент го наследил од мајчината страна на семејството. По отслужувањето на воениот рок, одлучил целосно да се посвети на пеењето – прво настапувал по кафани во Соколац, а потоа и низ Сараево.
Првиот сингл го објавил во 1979 година, со песните „Грешница“ и „Не буди ми наду“, а вистинската популарност ја стекнал неколку години подоцна со хитовите „Седи старац“, „Романија“, „Миљацка“, „Први пољубац“ и „Ја без тебе не могу да живим“.
Во текот на војната во Босна и Херцеговина, Бешлиќ организирал бројни хуманитарни концерти за помош на населението, иако ретко зборувал за тоа.
Борба со здравствените проблеми
Во последните години, пејачот се соочуваше со сериозни здравствени проблеми. Имаше проблеми со артериите и вените, поради што му беа вградени два стента. За да го подобри здравјето, мораше целосно да го промени начинот на живот – ослабе повеќе од 20 килограми, престана да пуши и речиси целосно се откажа од алкохолот.
„Разбуди ме сред ноќ – јас можам да запеам,“ изјави Бешлиќ во едно интервју, нагласувајќи дека музиката му е животна сила која никогаш не го напуштила.
Оди со песна што ќе остане вечна
Веста за неговата смрт предизвика тага низ целиот регион. Халид Бешлиќ зад себе остави богато музичко наследство и генерации обожаватели кои растеа со неговите песни.
Неговите балади ќе останат симбол на искрената емоција, топлината и душата на народот што тој со години ја пренесуваше преку својата музика.
„Сакам да ме паметат по песните, а не по болестите,“ знаел да каже Бешлиќ – и токму така ќе биде запаметен.
