Грција се соочува со изразен зимски удар, откако студен атмосферски фронт предизвика нагло заладување, снежни врнежи, појава на мраз и засилени северни ветрови на голем дел од територијата, предупредуваат метеоролошките служби во земјата.
Според најновите прогнози, снежни врнежи се очекуваат не само во планинските и повисоките региони, туку и во пониските делови од копното, при што снег може да паѓа и на надморска височина од околу 300 до 400 метри.
Зимските услови ќе ја зафатат и северна Грција, вклучително и областите на источна Македонија и Тракија, како и делови од регионите Сер и Халкидики. Снежна покривка се прогнозира и на неколку острови во северниот дел на Егејот, меѓу кои Лимнос, Лезбос, Хиос и островите од групата Споради.
Надлежните служби апелираат до граѓаните и возачите на зголемена внимателност, особено во подрачјата каде што се очекуваат интензивни врнежи и ниски температури.
