Католичката црква во Нови Травник, Босна и Херцеговина, изрази остар протест против филмот „Свадба“, повикувајќи на негов бојкот. Според нив, филмот на навредлив начин го претставува христијанството, што предизвика бурни реакции во јавноста.
Во објавата на социјалните мрежи, црквата истакнува дека филмот не само што навредува, туку и грубо се шегува со основните верски принципи. „Крвта на Христос, која е проливена за спасение на нашите души, сега е предмет на хумор и забава, а Бог е претворен во предмет на потсмев“, велат од црквата.
Тие сметаат дека слободата на изразување во уметноста не треба да значи навреда на туѓите верски уверувања. „Денес имаме премногу слободи, а одговорноста е минимална или воопшто не постои“, додаваат од црквата, нагласувајќи дека уметноста треба да поттикнува размислување, а не да создава поделби.
Црквата повика верниците да се приклучат на бојкот на 11-ти февруари, на споменот на Госпа Лурдска и Светскиот ден на болните. По завршувањето на миса, црквата ќе остане отворена до полноќ за молитва за сите уметници и креативци кои на ваков начин навредуваат верските слободи.
Филмот „Свадба“, во режија на Игор Шереги, веќе предизвика значителен интерес во регионот, со над 200.000 гледачи за само неколку дена. Но, со оглед на реакциите, прашањето за границите на уметничката слобода повторно се наметнува во јавноста.
