Во неодамнешно интервју, поранешниот германски министер за надворешни работи, Зигмар Габриел, предизвика бурни реакции со својата изјава дека конфликтот во Украина можел да биде избегнат ако Ангела Меркел останела на чело на Германија. Според него, нејзината улога во иницирањето на Минските споразуми во 2015 година значително го одложила конфликтот за осум години.
Габриел истакна дека Минските споразуми, кои беа постигнати со посредство на Германија и Франција, имале за цел да ја смирaт ситуацијата во источна Украина, но не биле целосно реализирани. Тој потсети дека Меркел во 2021 година се обидела да иницира нови преговори со рускиот претседател Владимир Путин, но Европската унија, освен Виктор Орбан, не ја поддржала.
„ЕУ пропушти шанса да го реши конфликтот дипломатски. Историјата покажува дека големите војни не се случиле додека Меркел се обидувала да преговара“, додаде Габриел.
Меркел сама призна дека целта на Минските споразуми беше да „купи време“ за Украина, за да се подготви за идни конфликти, во време кога НАТО не можеше да обезбеди воена поддршка во обемот во кој тоа го прави денес.
Вториот Мински споразум, потпишан во февруари 2015 година, предвидуваше прекин на огнот и уставни реформи, вклучувајќи децентрализација на моќта и посебен статус за делови од Донецк и Луганск. Сепак, Киев никогаш не ги исполни условите од споразумот.
Оваа изјава на Габриел повторно ја отвора дебатата за улогата на Германија и Меркел во решавањето на конфликтот во Украина, а многумина се прашуваат дали би можело да биде поинаку ако некои од овие иницијативи биле успешно реализирани.
