Соединетите Американски Држави и Иран постигнале договор за двонеделен прекин на огнот, кој предвидува и повторно отворање на Ормутскиот теснец – една од најважните светски поморски рути за транспорт на нафта.
Иако беше најавено дека постои „работлив“ план за ставање крај на конфликтот, американскиот претседател Доналд Трамп подоцна го нарече предлогот „измама“, без дополнително образложение. Засега не е прецизирано кога точно ќе започне прекинот на огнот.
Во меѓувреме, Трамп сигнализираше повлекување од претходните закани за проширување на воените операции против Иран. Само неколку часа претходно, тој предупреди дека „целa цивилизација може да исчезне преку ноќ“ доколку не се постигне договор, што предизвика остри реакции од дел од американските демократи, претставници на Обединетите нации и експерти за меѓународно право, кои оценија дека таквите закани се проблематични од аспект на меѓународното право.
Според информации од регионални извори, договорот предвидува и можност Иран и Оман да наплатуваат такси за бродовите кои минуваат низ Ормутскиот теснец. Овој премин, кој се наоѓа во територијалните води на двете земји, досега се сметаше за меѓународен воден пат без наплата на транзит.
И покрај договорот, ситуацијата на терен останува напната. Според израелски воен извор, Израел продолжува со напади врз цели во Иран, иако од Белата куќа претходно беше соопштено дека Израел се согласил со условите од прекинот на огнот. Од друга страна, и Иран продолжил со ракетни напади врз израелска територија.
Овие случувања укажуваат дека, и покрај дипломатските напори, примирјето засега останува кревко и неизвесно.
