Патниците во Аргентина од понеделник може да се соочат со сериозни проблеми во авионскиот сообраќај, откако Државната работничка асоцијација најави генерална стајка на речиси триесет аеродроми низ земјата. Синдикатот предупредува дека мерката ќе предизвика значителни доцнења, откажани летови и нарушување на редовниот распоред, токму во екот на летната туристичка сезона во Јужна Америка.
Штрајкот го организира синдикатот Државната работничка асоцијација (ATE), како реакција на, како што велат, одложените исплати на плати и непочитување на договорените зголемувања за вработените во Националната управа за цивилна авијација (ANAC).
Генералниот секретар Родолфо Агиар обвини дека властите ги оставиле работниците без навремена заработка и дека владата се повлекла од веќе постигнатите договори. Според него, доколку средствата не бидат исплатени, од полноќ во понеделник ќе започне целосен прекин на работата.
„Без плата – нема работа“, порача Агиар, најавувајќи дека ќе бидат вклучени службите за контрола на терен, инспекциските служби, пожарникарите, здравствените екипи и административниот персонал. Тоа практично значи дека голем дел од аеродромските операции ќе бидат стопирани.
Синдикатот најави дека ќе бидат погодени сите комерцијални летови, додека исклучоци ќе има само за државни, хуманитарни и медицински транспортни мисии.
Од друга страна, владата на претседателот Хавиер Милеј засега не излезе со официјален став за обвинувањата, но според синдикатите, токму одлуките на извршната власт довеле до ескалација на конфликтот.
Доколку не се постигне договор во последен момент, авиосоeќајот низ Аргентина во понеделник би можел речиси целосно да застане, што ќе погоди илјадници патници, туристи и авиокомпании.
