Светскиот Македонски Конгрес (СМК) упатува јавна покана за учество на 35. Генерално собрание, што ќе се одржи на 10 август 2025 година (недела), со почеток од 10:30 часот, во големата сала на Советот на Град Скопје, во Градскиот парк.
Очекувањата се големи – на собранието ќе присуствуваат пратеници и делегати од сите краишта на Македонија и од дијаспората. Во фокусот ќе бидат низа значајни резолуции што ќе се усвојат, меѓу кои:
- Резолуција за геноцидот врз македонскиот народ,
- Резолуција за името и идентитетот,
- Резолуција за статусот на Македонската Православна Црква – Охридска Архиепископија,
- Резолуција за пописот и одлуките на Уставниот суд,
- Резолуција за надворешната политика,
- Како и резолуција за настаните од 27 април 2017 година.
На настанот се поканети и највисоките државни претставници – претседателот на државата, премиерот и неколку министри, како и Поглаварот на МПЦ – ОА.
СМК ги повикува сите свои членови, здруженија и поединци, да го пријават своето присуство најдоцна до денот на одржувањето. Пријавувањето може да се изврши преку е-пошта на todorwmc@yahoo.com или со СМС на бројот 070 255 735. За здруженијата, потребно е да се достават основни податоци за организацијата и контакт лицата, додека поединечните членови треба да наведат лични податоци и контакт.
На 11 август, како дел од активностите, ќе се положи свежо цвеќе на гробот на великанот Гоце Делчев, во црквата „Свети Спас“. Панихида за сите борци за Македонија ќе се одржи со благослов на Архиепископот г.г. Стефан.
Светскиот Македонски Конгрес го одржува своето собрание во еден од клучните моменти за македонското прашање и останува платформа за застапување на националните интереси – дома и во светот.
