Македонската заедница во Австралија доби голема вест — општината Ливерпул официјално издаде одобрение за изградба на Македонска православна црква.
Одлуката ја поздрави советникот Петер Ристевски, кој ја истакна важноста на оваа иницијатива како доказ за силата на единството меѓу Македонците во дијаспората.
„Кога постои единство во Македонската заедница, резултатите се видливи. Припадниците на нашата заедница се почитувани во општината Ливерпул, придонесуваат во нејзиниот развој и воопшто во градот Сиднеј. Одобрението за изградба на македонска црква беше очекуван и заслужен чекор. Ќе продолжиме да градиме, ќе продолжиме да се бориме, ќе продолжиме да испорачуваме,“ изјави Ристевски.
Новата црква ќе претставува не само духовен центар за Македонците во Сиднеј, туку и симбол на нивниот континуиран придонес кон мултикултурното општество на Австралија.
Локалната заедница со воодушевување ја пречека веста, оценувајќи ја како историски момент за македонската дијаспора во Нов Јужен Велс. Со ова одобрение, започнува ново поглавје во духовниот и културниот живот на Македонците во Ливерпул.
