Македонското друштво „Илинден“ од Тирана остро реагираше против, како што го нарекоа, „децении долгата злоупотреба“ од страна на Софија, во врска со македонскиот јазик и националниот идентитет.
Во официјалното соопштение, здружението нагласува дека секој обид за негирање на постоењето на македонскиот народ и јазик е не само дискриминаторски, туку и опасен преседан кој ги загрозува европските вредности.
„Отстранувањето на македонскиот идентитет и јазик испраќа порака дека идентитетот е предмет на преговори за пристапување во ЕУ. Тоа ја охрабрува злоупотребата на политичка моќ и кршење на основните права“, се наведува во реакцијата.
Од „Илинден“-Тирана упатија директна порака до бугарското раководство, потсетувајќи дека македонскиот јазик и идентитет не се политичка конструкција, туку – историска реалност.
„Како Македонци, не ни треба ничие одобрение за да кажеме кои сме. Тоа право не е предмет на договори, туку фундаментално човеково право“, се вели во заклучокот на соопштението.
Македонското друштво „Илинден“ со години активно делува во Албанија, застапувајќи ги правата и интересите на македонското малцинство и подигајќи глас против секоја форма на негирање, асимилација или културна дискриминација.
