На денешен ден 1941 година во Скопје починал Јосиф Михајловиќ – Јурукоски, еден од позначајните тресончани кои живееле во периодот меѓу двете светски војни и оставил голем белег на Скопје, како градоначалник на овој град.
Роден на 28 мај 1887 година во Тресонче, од татко Михајло (Мијалче) и мајка Христина. во семејство на ѕидари и зографи. Својата наобразба ја започнал во Бигорскиот Манастир. Поради работата на татко си во реонот на Скопска Црна Гора, целата фамилија на Јосиф, кога тој имал само шест години, се преселила во скопското село Кучевиште. Таму Јосиф помагајќи му на татка си во работата го одушевил српскиот крал со неговата трудолљубивост (кој во тоа време бил во посета на Скопје), па кралот наредил да се запише неговото име и презиме, и подоцна Јосиф добива стипендија по што неговиот живот целосно се променува. Таму Јосиф завршил основно образование, нижа гимназија завршил во Скопје, а виша во Солун, каде како српски питомец матурирал во 1906 година. Тоа е времето кога територијата Македонија сè уште била под власт на Отоманското Царство.
Зографската и градителска историја на неговото семејство го натерало студирањето да го продолжи на Техничкиот факултет во Белград на отсекот архитектура. Го завршил за рекордно време, за само 4 години. По дипломирањето во 1910 година професорите го испратиле на постдипломски студии по архитектура во Италија, каде специјализирал на романската класична уметност на ренесансата.
Прва работна задача по враќањето од таа земја во 1911 година му било вклучувањето во тимот што ја проектирал зградата на Академијата на науките и уметностите на Србија и на градската палата на градот Белград.
На 29 јануари 1929 година бил назначен за градоначалник на Скопје односно за претседател на општинското Поглаварство. На оваа позиција останал се до 1936 година.
Извршувајќи ја својата функција, покрај другото, го направил и водоводот Рашче – Скопје, ја изградил термоцентралата под Кале, а ја започнал и изградбата на хидроцентралата Матка. Во својот речиси 10 годишен мандат го изградил и насипот на Вардар кај градски парк, го регулирал течението на Серава, а изградил бројни згради како што се зградата на Народното Собрание, Општинската зграда, Градска Болница, Хигиенскиот завод, Заводот за социјалното осигурување, Старата железничка станица, Народната Банка, Трговско-индустриската комора ( Метропол), Лекарската Комора, Домот на сојузот на инженерите и архитектите, Офицерскиот дом, Конзервната фабрика „Вардар”, бетонските мостови на Вардар и многу други.
Поопширно за Јосиф Михајловиќ – Јурукоски, особено неговите дела можете да прочитате ТУКА.
