Фудбалската асоцијација (ФА) објави дека нема да поднесе жалба на одлуката на независната комисија, која ги отфрли обвинувањата за местење натпревари против бразилскиот фудбалер Лука Пакета. По истрагата која започна во август 2023 година, ФА во мај 2025 година го обвини играчот на Вест Хем дека намерно добивал жолти картони со цел да влијае на пазарот на обложувања.
Истрагата се фокусираше на четири натпревари: против Лестер Сити во ноември 2022, Астон Вила во март 2023, Лидс Јунајтед во мај 2023 и Борнмут во август 2023. Комисијата, по детално разгледување на доказите, ги отфрли сите обвинувања, нагласувајќи дека немаат цврсти и убедливи докази. Во објаснувањето, кое опфаќа дури 314 страници, се наведува дека Пакета во сите ситуации реагирал согласно случувањата на теренот.
Во текот на истрагата, беше анализиран и телефонот на бразилскиот играч, но не беа пронајдени докази за обложување или комуникација поврзана со спорните натпревари. Дури и повеќе од 300 пораки, кои беа избришани и потоа вратени од експерти, не содржеа ништо што би укажувало на обложување.
Сепак, комисијата потврди две точки од обвинението поврзани со несоработка во истрагата, што подразбира кршење на правилата 13 и F2 на ФА, кои се однесуваат на доставување информации и документација. „Регулаторната комисија ќе одлучи за соодветната казна во најкраток можен рок“, се наведува во одлуката.
Во официјалното соопштение, ФА истакна дека одржувањето на интегритетот на фудбалот е приоритет, но го почитува решението на комисијата и нема да поднесе жалба. Иако Лука Пакета е ослободен од обвинувањата за местење натпревари, сè уште му се заканува дисциплинска мерка поради несоработка во истрагата. Резултатот од можната казна ќе биде познат во наредните денови, додека Вест Хем и бразилскиот фудбалер можат да здивнат, бидејќи најтешките обвинувања не беа потврдени.
