Официјална Турција објави дека нема да ги почитува новите регулативи на Европската Унија кои предвидуваат целосно откажување од увоз на руски гас до крајот на 2027 година. Оваа одлука може да отвори „дупка во системот“ што ќе овозможи рускиот гас да продолжи да влегува во ЕУ преку Турција, пишува „Политико“.
Турција, како клучна транзитна земја за руска енергија што се упатува кон Европа, не поддржува едностраните санкции на Брисел, сметајќи ги за ризик за економиите и енергетската безбедност. Според официјалното соопштение на Министерството за надворешни работи во Анкара, Турција ги спроведува само санкциите усвоени од Советот за безбедност на ООН.
Европската комисија предлага подобро следење на увозот на руски гас преку барање од компаниите да достават информации за потеклото на горивото, но Турција како земја што не е членка на ЕУ, нема правна обврска да ги спроведува овие мерки. Експерти предупредуваат дека неодговорниот став на Анкара може да го отежни спроведувањето на забраната и да овозможи рускиот гас да влегува во Унијата преку „задната врата“, особено преку транзитните точки кон Бугарија и Грција.
Отсуството на соработка помеѓу ЕУ и Турција доаѓа во момент кога односите меѓу двете страни се на најниско ниво, поради политички несогласувања и репресивните мерки во Турција против опозицијата.
Експерти предупредуваат дека без соработка со Анкара, ЕУ ќе има потешкотии да ја следи и ограничи увозната патека на рускиот гас, што го доведува во прашање ефективното спроведување на енергетските санкции против Москва.
