Министерството за внатрешни работи на Србија објави фотографија од мажот по кого интензивно се трага, откако вчера сред бел ден со нож нападнал жена во ходник на станбена зграда на Булеварот „Арсенија Чарнојевиќ“ во Нов Белград.
Нападот се случил околу 13:15 часот во Блок 37, кога осомничениот со остар предмет ѝ нанел повеќе убодни рани на 67-годишна жена, по што ѝ ја одзел чантата и побегнал во непознат правец.
Сигурносните камери го снимиле целиот настан. На видеото се гледа како жената заедно со мало дете влегува во ходникот на зградата, а неколку секунди подоцна зад нив се појавува напаѓачот. Во моментот кога жената почнува да се качува по скалите, мажот ја напаѓа одзади и ѝ нанесува повеќе убоди. Српските медиуми објавија дека детето кое било сведок на нападот е нејзиниот внук.
Повредената жена се здобила со тешки телесни повреди, меѓу кои убодни рани во пределот на главата и бутната коска, како и пневмоторакс. Таа итно е пренесена во Клиничко-болничкиот центар, каде се наоѓа на интензивна нега, а лекарите внимателно ја следат нејзината здравствена состојба.
Полицијата апелира до граѓаните кои имаат информации за осомничениот веднаш да ги пријават во најблиската полициска станица.
