Во Велика Британија, над 1.400 пабови и ресторани одлучија да не служат пратеници од владејачката Лабуристичка партија, како форма на протест против зголемувањето на даноците на комерцијалните имоти. Сопствениците на овие угостителски објекти истакнуваат дека новите даночни обврски ќе им донесат дополнителни трошоци од неколку илјади фунти годишно.
Планираното зголемување на данокот беше објавено во ноември, а во декември, непосредно пред Божиќ, пабовите започнаа да објавуваат дека лабуристичките пратеници не се добредојдени. Според податоците на професионалната организација UKHospitality, просечната годишна закупнина за угостителските објекти во 2026 година ќе се зголеми за околу 1.400 фунти, а во следните години ќе продолжи да расте, достигнувајќи вкупно зголемување од дури 7.000 фунти.
Во исто време, владата ја укина дел од помошта која беше воведена за време на пандемијата, што дополнително ги оптоварува пабовите и рестораните. Според британските медиуми, притисокот од угостителите почнува да дава резултати, а лабуристичката влада е подготвена да направи отстапки. Во наредните денови се очекува објава за повлекување на зголемувањето на данокот на комерцијалните имоти.
Еден од иницијаторите на оваа акција, Енди Ленокс, сопственик на пабот The Old Thatch на југот на Англија, изјави дека кампањата привлекла внимание, можеби и поради тоа што е забавно да се види како политичарите не можат да влезат во пабовите. Меѓутоа, некои лабуристички пратеници ја критикуваат оваа кампања, тврдејќи дека таа ја нарушува инклузивноста на локалните бизниси и повикуваат на исклучување на политиката од пабовите, особено во текот на празниците.
