Економијата продолжува да покажува стабилен раст: бруто-домашниот производ во третото тримесечје од 2025 година се зголеми за 3,8 проценти во однос на истиот период лани, покажуваат најновите проценки на Државниот завод за статистика.
Најголем придонес кон растот повторно даваат градежните активности, кои бележат импресивно зголемување од 21 проценти, а значителен пораст се забележува и во секторот информации и комуникации, каде растот достигнува 7,4 проценти.
Бруто-инвестициите во основни средства се издвојуваат како клучен двигател на економската експанзија. Нивното учество во структурата на БДП се покачува од 26,1 проценти во третото тримесечје од 2024 година на 31,1 проценти оваа година, што укажува на засилено инвестирање и повисока економска активност.
Финалната потрошувачка, која традиционално има најголемо учество во домашната економија, во овој период номинално расте за 7,7 проценти и опфаќа 80,2 проценти од вкупниот БДП.
Според сезонски и календарски прилагодените податоци, растот на економијата изнесува 3,6 проценти, што упатува на доследно позитивни трендови без поголеми сезонски влијанија.
