Google најавува нова функција за својот чат бот Gemini, која ќе им помогне на корисниците да избегнат преголемо поврзување со вештачката интелигенција. Оваа функција ќе испраќа предупредувања до корисниците ако премногу долго комуницираат со Gemini. Во тестната верзија на Google апликацијата за Android, забележан е систем на известувања кој се активира по продолжена интеракција со ботот.
Предупредувањето е во форма на поп-up порака која јасно укажува на тоа дека корисникот разговара со вештачка интелигенција, а не со вистинска личност, дури и ако комуникацијата изгледа природно и емпатично. Оваа иницијатива доаѓа во време кога Gemini добива нови можности за одговарање на лични и сложени прашања, користејќи податоци од различни Google сервиси.
Целта на Google е да се спречи емоционалното поврзување на корисниците со AI, проблем на кој експертите сè повеќе укажуваат, особено кај помладите корисници. Gemini треба да се користи како алатка, а не како замена за вистински разговори и релации. Сепак, засега не е познато по колку време ќе се појавува предупредувањето, а можно е корисниците да добијат опција да ја прилагодат фреквенцијата на пораките, слично на функцијата за пауза на YouTube.
Функцијата моментално е во фаза на тестирање и не е достапна за широка јавност. Google сè уште не се огласил за точниот датум на воведување на оваа новина.
