Во централното подрачје на Кочани, двете главни улици ќе претрпат значајни промени во режимот на сообраќај. Улицата Маршал Тито, од плоштадот до двојниот мост, и улицата Кеј на револуцијата, од кружниот тек кај полициската станица до плоштадот, ќе станат еднонасочни. Овие промени се направени во согласност со сообраќајната документација, потврдуваат од општината.
„Наскоро ќе се промени режимот на сообраќај на двете главни улици во централното градско подрачје во Кочани, согласно изработена сообраќајна документација. Сообраќајот на потегот од кружниот тек кај Полициската станица во Кочани, со дел од ул. ‘Тодосија Паунов’ и ул. ‘Кеј на Револуцијата’ ќе се одвива еднонасочно, во правец југ-север до мостот кај Градскиот плоштад. Еднонасочна ќе биде ул. ‘Маршал Тито’, на потегот од мостот кај Градскиот плоштад кон кружниот тек кај Двојниот мост на ул. ‘Никола Карев’. Промената на режимот на овие улици е резултат на констатираните проблеми на стационарниот сообраќај, односно недостатокот на места за паркирање на возила во централното градско подрачје,“ – стои во соопштението од општината.
Предлогот за новиот сообраќаен режим беше предмет на расправа на неколку јавни собири, на кои учествуваа претставници од локалните институции, транспортни компании, такси-служби, стручни лица, граѓански организации, како и претставници од полициската станица, ТППЕ и ДПД, Итната медицинска помош, урбани и месни заедници, советници и граѓани.
Избран економски оператор изготви основен сообраќаен проект и стручна ревизија, по што СВР – Штип даде согласност, а Општина Кочани издаде решение за утврдување на режим на сообраќај за динамичен и стационарен сообраќај во централното градско подрачје. Општина Кочани и Подрачното одделение за безбедност во сообраќајот на патиштата – Кочани заеднички работат на решенијата за надминување на актуелните проблеми во сообраќајот, а промените ќе се реализираат наскоро во соработка со ПО за БПС Кочани.
