Во Општина Кичево, во салата на Советот, се одржа значаен интеркултурен форум кој ги обедини гласовите на немнозинските заедници. Настанот, организиран во соработка со Форумот на немнозинските заедници во Република Македонија, имаше за цел да поттикне културната различност, меѓусебното почитување и заедничкото градење на инклузивно општество.
Градоначалникот на Општина Кичево, Д-р Александар Јовановски, во своето обраќање ја истакна важноста на културниот дијалог како основа за локален развој и социјална кохезија. Тој нагласи дека Кичево е град со богато мултикултурно наследство, каде различностите не се само предност, туку и мост на заедништво.
На форумот присуствуваа бројни значајни личности, вклучувајќи го екс премиерот Емил Димитриев, заменик-министерот за јавна администрација Лазе Јаќимоски и Националниот координатор за меѓуетничка соработка Салко Куч. Настанот го водеше Наташа Станчиќ, а координаторот на Форумот, Братислава Танасковиќ, ја истакна мисијата на Форумот за промоција на правата и интересите на немнозинските заедници.
Посебен акцент на форумот беше ставен на младите луѓе, кои преку свои успеси и ангажман придонесуваат за афирмација на меѓусебното разбирање и соработка. Градоначалникот Јовановски додели сертификати и признанија на млади активисти, како симболично признание за нивниот труд и посветеност.
Форумот беше организиран во духот на одбележувањето на 21 Мај – Светски ден на културната разновидност за дијалог и развој, со цел да се поттикне свеста за значењето на културните разлики и дијалогот. Кичево, како град познат по својата културна разновидност и традиција на меѓусебно разбирање, уште еднаш потврди дека различностите не нè делат, туку нè зближуваат.
Општина Кичево останува посветена на поддршка на иницијативи кои ја унапредуваат културата, дијалогот и активното учество на сите заедници во локалниот развој. Со почит кон секоја култура и заедничка визија за подобра иднина, Кичево продолжува да гради мостови на соработка и доверба.
