Приштина, 7 септември 2024 (МИА) – Министерката за надворешни работи на Косово, Доника Грвала, ги повика Европската унија и Соединетите Американски Држави да преземат мерки против претседателот на Србија, Александар Вучиќ, откако вчера се затворија граничните премини за влез во Србија од Косово, јави дописникот на МИА од Приштина.
„Тој мора да се запре пред да започне војна“, напиша Грвала на Твитер во петокот вечерта.
По блокадите на српската страна на граничните премини од страна на групите кои протестираат против одлуките на косовските власти на северот на Косово, шефицата на косовската дипломатија рече дека во овие дејствија е инволвирана и српската држава.
„На другата страна од границата во Берњак, маскирани Срби запираат автомобили со германска регистрација и не ги пуштаат Албанците да поминат. Полицијата на Вучиќ ја поддржува оваа расистичка ескалација, гледа и не прави ништо“, напиша Грвала.
Таа најави и дека Косово исто така ќе ја држи границата затворена, „сè додека не се гарантира слободното движење и Албанците не се безбедни од најлошите сцени на маскирани српски криминалци кои повторно ги прогонуваат и им се закануваат“.
„Ги повикуваме ЕУ и САД цврсто да се спротивстават на следните ескалирачки чекори на Вучиќ. Тој мора да се запрен пред да започне војна“, порача Грвала.
Претходно во петокот министерот за внатрешни работи на Косово, Џељаљ Свечља најави затворање на граничниот премин во Брњак. Во еден случај, според Свечља, семејство кое патувало од Косово за Германија не можело да го продолжи патувањето и било насилно вратено назад. Тој овие дела ги нарече фашистички и рече дека се случуваат пред очите на полицијата на Србија, која ја нарече соучесник.
Другите патишта во Србија, кои водат до граничните премини со Косово, Мердаре и Јариње, беа блокирани во петокот попладне од групи кои протестираа против одлуките на косовските власти на северот на Косово.
Блокадата ја најави „Советот за блокади на Србија“ откако косовската полиција затвори пет канцеларии на паралелни српски структури на северот на државата, населен со мнозинско српско население, поради сомневање за наводно фалсификување документи.
Во акцијата на 30 август беа затворени канцелариите на четири паралелни општини – Митровица, Лепосавиќ, Зубин-Поток и Звечан, како и канцеларијата на Округот Косовска Митровица.
Меѓународната заедница ја критикуваше Владата предводена од премиерот Албин Курти за ова и за други дејствија на косовскиот север, повикувајќи ја да се воздржи од „дејства што би можеле да поттикнат тензии“.
По предупредувањето за блокада, косовските институции ги повикаа граѓаните да избегнуваат преминување од Србија. Министерството за надворешни работи побара од граѓаните да избегнуваат транзит преку граничните премини со Србија, а Националниот центар за гранично управување повика границата да не се минува ниту на единствениот премин со Црна Гора, Кула.
Од Илир Ајдини/МИА
