Загрепската полиција уапсила 25-годишна државјанка од Македонија под сомнение дека учествувала во измама на 87-годишна жена, од која биле земени 40.000 евра. Според хрватските медиуми и полицијата, по уште две лица, исто така наводно македонски државјани, сè уште се трага.
Како што објави „Јутарњи лист“, случајот се случил на 22 декември минатата година, кога измамниците телефонски стапиле во контакт со повозрасната жена од Загреб. Еден од нив лажно се претставил како лекар и ѝ соопштил дека нејзината ќерка наводно се наоѓа во болница, каде итно требало да биде оперирана поради скршеница на ногата.
Во разговорот, на жената ѝ било кажано дека за операцијата се потребни 50.000 евра. Таа одговорила дека има 40.000 евра и побарала да се слушне со својата ќерка, но добила одговор дека таа не е во состојба да зборува.
Следното утро, според истрагата, жената повторно добила телефонски повик. Овојпат, една жена наводно се претставила како нејзината ќерка, обидувајќи се дополнително да ја увери во приказната за несреќата, повредата и неопходната операција.
Под силен притисок и во уверување дека ѝ помага на својата ќерка, 87-годишната загрепчанка ги подготвила парите во кеса, како што ѝ било кажано, чекајќи лице кое требало да ги подигне.
Набргу потоа, 25-годишната македонска државјанка пристигнала со такси на адресата на оштетената во загрепската населба Дубрава, каде, според полицијата, ѝ биле предадени 40.000 евра.
Од Полициската управа Загреб информираат дека осомничената е предадена на притворски надзорник со кривична пријава за измама со цел стекнување противправна имотна корист, додека потрагата по другите две лица продолжува.
