Повеќе од 32.000 бремени жени во Куба се соочуваат со зголемени здравствени ризици поради недостигот на гориво, што директно влијае врз пристапот до медицински услуги, соопшти кубанското Министерство за јавно здравје.
Според официјалните податоци, ограничувањата во снабдувањето ја отежнуваат реализацијата на клучни дијагностички процедури, како што се акушерските ултразвуци и генетските тестирања, кои се неопходни за навремено откривање на компликации кај бремените жени.
Проблеми има и во транспортот на пациенти и медицински тимови, што влијае врз критичната неонатална нега, програмите за вакцинација и третманот на деца со хронични заболувања.
Од Министерството предупредуваат дека недостигот од лекови, реагенси, медицинска опрема и резервни делови ја намалува ефикасноста на болниците, операционите сали и единиците за интензивна нега низ земјата.
Дополнителен притисок создаваат зголемените трошоци за увоз и намалениот број комерцијални летови, што ја отежнува набавката на неопходни медицински средства.
Според проценките, ситуацијата може да влијае и врз повеќе од 61.000 новороденчиња кои бараат посебна медицинска грижа, како и врз пациенти со рак, дијабетес и други хронични заболувања.
И покрај предизвиците, здравствените работници во Куба продолжуваат да обезбедуваат медицинска помош, но предупредуваат дека состојбата станува сè потешка.
