Додека Европската унија планира да забрани продажба на нови возила на фосилни горива до 2035. година, истражувањето на фирмата carVertical открива дека дури 51,5% од купувачите во моментов не би размислувале за купување електричен автомобил, а само 12,2% би го разгледале тоа како опција. Преференциите на возачите остануваат цврсто на страната на конвенционалните горива – 43,8% од испитаниците преферираат бензин, 38,9% дизел, додека само 5,6% избираат електричен погон.
Меѓу оние кои размислуваат за електрични возила, главните мотиви се поевтино одржување (47,2%), пониски даноци (17,6%) и државни субвенции (14,1%). Занимливо е што само 14% од испитаниците наведуваат еколошки причини како мотив за купување, пренесува Index.hr. Главните причини против купување електрични возила се високата цена (32%), загриженоста за дометот (26,7%) и лошата инфраструктура за полнење (21,1%).
Укинувањето на државните поттикнувања во земји како Шведска и Германија веќе резултираше со значителен пад на продажбата на електрични возила. Матас Бузелис, експерт за автомобили во carVertical, предупредува: “Владините поттикнувања се скап начин за зголемување на продажбата на електрични возила, но вистинскиот проблем е одржливоста.”
Големите производители на автомобили најавуваат значителни намалувања на работните места поради промените на пазарот. Во исто време, кинеските производители како BYD бележат силен раст во Европа, надминувајќи ја дури и Тесла во продажбата на електрични возила на одредени пазари.
