По завршувањето на натпреварот со Данска, македонските ракометари се насочуваат кон новиот предизвик – дуелот со Португалија. На утринскиот брифинг со новинарите, селекторот Кирил Лазаров истакна дека следниот ривал е сериозна репрезентација, која доаѓа со амбиции за медал. „Нашиот следен ривал Португалија, тоа е одлична репрезентација и тука се дојдени да се борат за медал. Но, тие не се на нивото на Данска“, изјави Лазаров.
Тој нагласи дека е клучно за македонскиот тим да покаже подобра игра во однос на претходниот натпревар. „За нас најважно е да се обидеме да одиграме подобро од дуелот со Данска. Сите ние сакаме изненадување“, додаде селекторот. Португалија важи за фаворит, но Лазаров верува дека неговиот тим може да им го „поремети“ планот. „Тие сметаат дека можат да стигнат и до медал“, рече Лазаров, истакнувајќи дека цела ноќ поминал во анализа на противникот.
Дуелот од второто коло македонските ракометари ќе го одиграат утре (недела) со почеток во 18 часот во Хернинг.
